Жаңалықлар







ГЕЗЕКТЕГИ CЕССИЯ БОЛЫП ӨТТИ

 

        Бүгин,    29-апрель күни Нөкис қаласы ҳәкимлигинде Халық депутатлары Нөкис қалалық Кеңесиниң гезектеги   жигирма сегизинши  сессиясы болып өтти.

       Сессия жумысына Халық депутатлары Нөкис қалалық Кеңесиниң депутатлары, қала ҳәкими орынбасарлары, сектор басшылары ҳәм ғалаба хабар ўакиллери қатнасты.

       Сессияны Халық депутатлары Нөкис қалалық Кеңеси баслығының орынбасары Т.Дошекенов басқарып барды.

       Сессияда күн тәртибиндеги мәселе бойынша Нөкис қаласында “Жаслар дәптери”не киргизилген жасларды кәсип-өнерге үйретиў, олардың бәнтлигин тәмийинлеў, исбилерменлик басламаларын қоллап-қуўатлаў, социаллық қорғалыўын күшейтиў ҳәм машқалаларын сапластырыў бойынша Жаслар ислери агентлиги Нөкис қалалық бөлими баслығы А.Ильясовтың есабаты тыңланды. Баянатшы мәмлекетимиздеги жоқары оқыў орынларында билим алып атырған «Темир дәптер»ге киргизилген шаңарақлардың перзентлериниң шәртнама суммасының 50 пайызын төлеп бериў бойынша “Жаслар дәптери”не киргизилген жасларды қоллап-қуўатлаў жамғармасы Нөкис қалалық Каўендерлик кеңесиниң 2021-жыл 17-апрель күнги 02/П-34-3-санлы баянламсын тастыйықлаў бойынша өз пикирин билдирди. Соның менен бирге Нөкис қаласы аймағынан “Жаслар дәптери”не киргизилген жаслардың социаллық жақтан қоллап-қуўатланған ҳәм бәнтлиги тәмийинленген жасларды дәптерден шығарыў мәселесин депутатларға усыныс етти. 

     Сессияда Нөкис қаласы Мәҳәлле ҳәм шаңарақты қоллап-қуўатлаў бөлими баслығының биринши орынбасары Г.Абибуллаева “Ҳаяллар дәптери”не киргизилген ҳаялларды кәсип-өнерге үйретиў, олардың бәнтлигин тәмийинлеў, исбилерменлик басламаларын қоллап-қуўатлаў, социаллық қорғалыўын күшейтиў ҳәм машқалаларын унамлы шешиўде 2021-жылда Нөкис қаласында “Жол картасы” тийкарында әмелге асырылған жумыслары бойынша есабаты тыңланды. “Ҳаяллар дәптери”не киргизилген ҳаял-қызлар менен ушырасыўлар өткериў арқалы олардың мүтәжликлерин анықлаў, жумыссыз ҳаял-қызларды мийнет базарында талап жоқары болған кәсип-өнерге оқытыўда, исбилерменлик пенен шуғылланыў нийетин билдиргенлер ушын ҳәр тәреплеме әмелий жәрдемлер көрсетиў ўазыйпалары, социаллық қорғаўға мүтәж жумыссыз  ҳаял-қызлардың бәнтлигин тәмийинлеў, бағыўшысын жоғалтқан, социаллық жәрдемге мүтәж майыплығы болған ҳаял-қызларды қоллап-қуўатлаў, натурар жайларда жасап киятырған, үй-жайын оңлаўға мүтәж, қарамағында майыплығы болған балалары бар, ҳаял-қызларға медициналық ҳәм әмелий жәрдемлер көрсетиў бойынша кең түрде баянат жасады ҳәм усы илажларды әмелге асырыўда депутатларды тийисли тараў ўәкиллери менен тығыз бирге ислесиўге шақырды.

    Соңынан Нөкис қаласы Ишки ислер органларының жумысларын муўапықластырыў басқармасы баслығының орынбысыры П.Шамшетов 2021-жылдың 1-шереги даўамында қала аймағында Ҳуқықбузарлық ҳәм жынаяттың алдын алыў, жынаятшылыққа қарсы гүресиў, жәмийетлик тәртипти сақлаў, пуқаралардың тынышлығын ҳәм қәўипсизлигин тәмийинлеў бойынша әмелге асырылған жумыслар ҳаққындағы есабаты тыңланды. Ол жәмәәтшилик пенен биргеликте қала аймағындағы барлық мәҳәллелерде, биринши нәўбетте, жынаятшылықтың артыўы гүзетилген мәҳәллелерде ҳуқықбузарлықлар профилактикасы ҳәм жынаятшылықтың алдын алыўға қаратылған ис-илажлар, ҳуқықбузарлықлар профилактикасын шөлкемлестириў мақсетинде ҳәр бир жынаят бойынша кийинги күнниң өзинде мәкан пуқаралар жыйыны ўәкиллери менен ҳәм сол аймақта жасаўшы халық ортасында жынаяттың келип шығыўы себеплери ҳәм оларды сапластырыўға айрықша итибар қаратыўда барлық пуқаралардың жуўапкершилигин арттырыў бойынша пикир-усынысларын билдирди.

     Буннан кейин Нөкис қалалық Медицина бирлеспесиниң баслығы Ж.Тарихов баянат жасады ҳәм ол усы жылдың 1-шерегинде медицина тараўында әмелге асырылған жумыслар бойынша есабат берди. Мағлыўматлар бойынша мысаллар келтирди.

      Сессия жумысы даўамында С.Уснатдинов сөзге шығып, Нөкис қалалық Мәмлекетлик салық инспекциясы тәрепинен 2021-жыл I шерек даўамында бюджет дәраматларының өндирилиўи бойынша белгиленген ўазыйпалардың орынланыўы ҳаққында тоқтап өтти.

    Нөкис қаласы ҳәкиминиң Санаатты раўажландырыў, капитал қурылыс, коммуникациялар ҳәм коммунал хожалығы бойынша орынбасары Р.Ибрагимов өз баянаты менен шығып сөйлеп, Нөкис қаласында 2022-жылда “Абат аўыл” ҳәм “Абат мәҳәлле” Мәмлекетлик бағдарламаларын әмелге асырыў бойынша дәслепки мәнзилли дизимин татыйықлаў ҳәм  бағдарлама шеңберинде мәҳәллелерде жасаўшы халықтың турмыс шараятын жақсылаў,  социаллық инфрадүзилме объектлерин қурыў ҳәм оңлаў, аймақларды абаданластырыў ҳәм көклемзарластырыў жумысларын әмелге асырыў режелестирилгенлигин атап өтти.

    Сессия жуўмағында қаралған мәселелер бойынша депутатлар пикир-усыныслары менен бөлисти ҳәм күн тәртибиндеги мәселелер бойынша тийисли қарарлар қабыл етилди.     

 

Нөкис қаласы ҳәкимлиги Мәлимлеме хызмети