Жаңалықлар







Қәтелер мәкемениң абыройын түсириў қуралына айланбасын!

Бүгин, Телеграм социаллық тармағындағы каналлардың биринде «Қәте жибериўде  Нөкис қаласы прессасынан өтетуғыны жоқ!» темасында пост жәрияланды. Онда ҳәкимликтиң Мәлимлеме хызмети тәрепинен «ҳәзирги» деген сөздиң «ҳәзиги» көринисинде жазылғаны, яғный, қәтеге жол қойғаны ҳәкимият жумыс барысы ҳаққындағы пикирлерге тәсир етиўи жазылған.

Биринши нәўбетте, Нөкис қаласы ҳәкимлигиниң телеграм  каналын гүзетип барыўшылардан жол қойылған бундай қәте ушын кеширим сораймыз. Буннан былай да ҳәр бир жәрияланған постқа және де итибар менен қарайтуғынлығын мәлим етемиз.

Екиншиден, Нөкис қаласы ҳәкимлиги тәрепинен әмелге асырылып атырған ис-илажлардың әмелий көринисин қаламыздың жылдан-жылға раўажланыўынан көриў мүмкин. Дурыс, еле де ислениўи тийис болған жумыслар көлеми көп. Сондай болса да, бул жумыслар басқышпа-басқыш әмелге асырылады.    

Соның менен бирге блогер ҳәм журналистлер де өзлериниң блогларында қарақалпақ тилиниң қағыйдаларына әмел етсе мақсетке муўапық болар еди. Себеби, мәмлекетлик тил есапланған қарақалпақ тилин таза сақлап, келешек әўладқа жеткериўинде бәршемиз теңдей жуўапкермиз!

Нөкис қаласы ҳәкимлиги Мәлимлеме хызмети