Жаңалықлар







Пайтахтымызда «Китапқумарлық ҳәптелиги»

    Бүгин 5-апрель күни Нөкис қаласындағы «Истиқлол» балалар дем алыў бағында Қарақалпақстан Республикасы Министрлер Кеңесиниң усы жылдың 2-апрель күнги «2021-жылдың 6-7-апрель күнлери Бозатаў районында қосықшылық фестивалы ҳәм де 5-9-апрель күнлери Нөкис қаласы ҳәм районларда «Китапқумарлық ҳәптелиги»н жоқары дәрежеде өткериў ҳаққында»ғы баянламасына тийкарланып, Нөкис қаласы жасларының қатнасыўында байрам илажы болып өтти.

       Илажға Өзбекстан ҳәм Қарақалпақстан Жазыўшылар аўқамы ағзалары ҳәм бир қатар мәкеме-кәрхана ҳәм шөлкемлерден ўәкиллер қатнасып, усы илажды өткериўдиң әҳмийети, жас әўладтың китапқумарлыққа болған қызығыўшылығын еле де арттырыў, миллий мәдениятымызды ҳәм әдебиятымызды дүньяға танытыў бағдарында ҳүкиметимиз тәрепинен алып барылып атырған ийгиликли ислер ҳаққында өз пикирлерин билдирди.

      Илаж даўамында «Сиз сүйип оқыған китап!», «Китап бул жәмийеттиң байлығы», «Мен сүйген китапханаға китап саўға етемен», «Қарақалпақ фольклоры», «Юбиляр китаплар», «Жаңа китаплар презентациясы» атамасындағы акциялар, китап көргизбелери ҳәм таңлаўлардың өткерилиўи белгиленген.

      Усы илажды өткериўде Нөкис қаласы ҳәкимлиги, қалалық мәденият бөлими, қалалық халық билимлендириў бөлими, қалалық Жаслар ислери агентлиги, ишки ислер органлары жумысларын муўапықластырыў басқармасы, Айрықша жағдайлар бөлими хызметкерлерине де жуўапкерли ўазыйпалар жүклетилген.

     Илаж соңында елимизге белгили көркем өнер ғайраткерлериниң атқарыўындағы концерт бағдарламасы қатнасыўшылар итибарына инәм етилди.