Жаңалықлар







«Ашшы көл» бойында дем алыў орайы шөлкемлестириледи

 
2020-жыл 25-ноябрь күни Нөкис қаласындағы Қарақалпақстан Республикасы Саўда санаат палатасында Нөкис қаласы ҳәкимлиги басшылығында Қарақалпақстан Республикасы Қурылыс министрлиги ҳәм АКБ Асакабанк қатнасында «Инвесторлар күни» болып өтти. 
 
Иләжда Нөкис қаласында 2020-2022-жыллар даўамында иске түсирилиўи режелестирилген 15 жаӊа инвестиция жойбарлар ҳаққында мағлыўмат берилип, жойбарлардың презентациясы өткерилди.
 
Улыўмалық баҳасы 27 млн. 38 мыӊ АҚШ долларлық 15 жойбардыӊ иске түсирилиўи нәтийжесинде қалада 880 жаӊа жумыс орны жаратылады. Бул жойбарлар тийкарында қалада медициналық хизмет көрсетиў, азық-аўқат өнимлери, қағаз ислеп шығарыў, дем алыў орынларын жаратыў, жеке мектеплерди ашыў, шарўашылық сондай-ақ қурылыс материалларын ислеп шығарыў, көп қабатлы турақ жайларды қурыў режелестирилген.
 
Халықтың кеўилли дем алатуғын жерлерин көбейтиўди мақсет еткен исбилерменлердиӊ жойбарлары туўралы да иләж қатнасыўшыларына мағлыўмат берилди. Солардан бири «Ашшы көл» бойында қурылыўы режелестирилген дем алыў орны жойбары.  
 
-  Бул жойбардыӊ улыўмалық баҳасы 4,5 млн. АҚШ доллар. Дем алыў орнында мийманхана, ишки ҳәм сыртқы бассейнлер, фитнес залларын қурыў режелестирилген. Ҳәзирги күнде Нөкис қаласы ҳәкимлиги тәрепинен 6 гектар жер ажыратылған болып, жойбар 2022-жылда толық пайдаланыўға тапсырылады - дейди «Etalon Engineering Stroy group» ЖШЖ директори Батыр Утемуратов. 
 
Нөкис қаласы ҳәкимлиги Мәлимлеме хызмети