Жаңалықлар







Кеўилашар илажлар даўам етпекте


Хабарыӊыз бар, Нөкис қаласында 11-ноябрьден берли  "Жаңа Өзбекстан - жаңаша дүньяқарас" атамасы тийкарында кеўилашар илажлар өткерилмекте.

Усы атамадағы илажлардыӊ бири 18-ноябрь күни Қарақалпақ Мәмлекетлик жас тамашагөйлер театрында болып өтти. Илаж китаплар ҳәм қарақалпақ қол өнери үлгилери көргизбеси менен басланды. Шеберлик пенен таярланған, көргизбеден орын алған ҳәр бир дөретиўшилик мийнетлери  қатнасыўшыларда үлкен қызығыўшылық оятты. Сондай-ақ, өткерилип атырған илажларда халқымыздыӊ руўхый ҳәм мәдений дем алыўында белсенди қатнасқан өнерментлерге Нөкис қаласы ҳәкимлиги тәрепинен миннетдаршылық билдирилди.

Буннан соӊ "Жаңа Өзбекстан - жаңаша дүньяқарас" атамасы тийкарында концерт бағдарламасы жыйналғанлардыӊ итибарына усынылды. Өзбекстан ҳәм Қарақалпақстан Республикаларына белгили, халқымыз сүйген мәденият ҳәм көркем өнер хызметкерлериниӊ қосық ҳәм ойынлары, шайырлар тәрепинен оқып берилген дөретпелери, таярланган видеороликлер тамашагөйлердиӊ кеуил-кейпиятын көтерыўине ҳәм мазмунлы дем алыўына үлес қосты.

Илажға Қарақалпақстан Республикасы Мәҳәлле ҳәм шаңарақты қоллап-қуўатлаў министри С.Турманов қатнасып, жыйналғанларды Өзбекстан Республикасының мәмлекетлик байрағы қабыл етилген  күни байрамы менен қутлықлады ҳәм "Жаңа Өзбекстан - жаңаша дүньяқарас" атамасы тийкарында өткерилип атырған илажлардыӊ  ҳалқымыз тәрепинен жақсы қарсы алып атырғанлығына тоқтады. 

Илаж даўамында өткерилген викторина ойынлары да жыйналғанлардыӊ  интеллектуал билимин сыннан өткерди ҳәм берилген сораўлардыӊ жуўабын тапқанларға естелик саўғалары тапсырылды.

"Жаңа Өзбекстан - жаңаша дүньяқарас" атамасы тийкарындағы илажларлар Нөкис қаласында 22-ноябрьге дейин даўам етеди.

Нөкис қаласы ҳәкимлиги  мәлымлеме хизмети