Жаңалықлар







Нөкис қаласында 2020-2022-жылларда 181 жойбарлар әмелге асырылады

 

Нөкис қаласы ҳәкимлигинде Өзбекстан Республикасы Президенти тəрепинен 11-ноябрь күни қабыл етилген «Қарақалпақстан Республикасын комплексли социаллық-экономикалық раўажландырыў иләжлары ҳаққында»ғы ПҚ-4889-санлы қарары орынланыўын тәмийинлеў бойынша Халық депутатлары Нөкис қалалық Кеңесиниң депутатлары менен мәжилис болып өтти.

Мәжилиске қарар талапларының орынланыўы бойынша дүзилген исши топары ағзалары, Өзбекстан Республикасы Олий Мажлиси Нызамшылық палатасы депутатлары, Олий Мажлиси Сенаты ағзалары, Нөкис қаласы ҳәкими, ҳәким орынбасарлары, Халық депутатлары Нөкис қалалық Кеңесиниң депутатлары, тийисли тараў ўакиллери ҳәмде ғалаба хабар қуралларының ўәкиллери қатнасты.

Мәжилисте қарардан орын алған Қарақалпақстан Республикасы, сониӊ ишинде  Нөкис қаласының өсиў ноқатлары (драйвер тараўлары), социаллық-экономикалық раўажланыў дəрежеси аўыр болған қаладағы мәкан пуқаралар жыйынларды раўажландырыў, 2020/2023-жылларда жаңа жумыс орынларын жаратыў бойынша мақсетли көрсеткишлер ҳəм басқада мəнзилли дизимлер менен инвестициялық жойбарлар ҳаққында мағлыўмат берилди.

Соның менен бирге, Қаракалпақстан Республикасы бойынша халықтың турмыс шараятын жақсылаў ҳәм аймақларды абаданластырыў бойынша ис-илажлар бағдарламасы ислеп шығылды. Усы ислеп шығылған ис-илажларға муўапық, исбилерменлик субьектлери ушын бир қатар имканият ҳəм жеңилликлергеде айрықша тоқталып өтилди.  

Мағлыўмат ушын, Нөкис қаласының 2020/2023-жыллардағы «өсиў точка»сы - қурылыс материаллары ҳәм азық-аўқат өнимлерин ислеп шығарыў тараўлары етип белгиленген. Усы тараўда жаңадан ашылып атырған кәрханаларға 2024-жыл 1-январьға шекем жер салығы, мал-мүлк салығы, киши кәрханалар пайдасынан алынатуғын салық, жеке тәртиптеги исбилерменлердиң белгили муғдардағы дәрамат салығын төлеўден азат етиледи. 

Нөкис қаласында 2020-2022-жылларда улыўма баҳасы 882,6 млрд.сўмлық 1 639 жаңа жумыс орынларын жаратыўшы 181 жойбарларды әмелге асырыў режелестирилген. 

Илажда бул бағдарда исленетуғын әҳмийетли жумыслар ҳәм олардыӊ орынланыўы ҳаққында депутатлар да өзлериниӊ пикир-усынысларын билдирди.

Нөкис қаласы ҳәкимлиги Мәлимлеме хызмети