Жаңалықлар







Баспасөз конференциясы өткерилди


2020-жыл 14-ноябрь күни  Нөкис қаласы ҳәкимлиги тәрепинен Нөкис қаласында әмелге асырылған ҳәм режелестирилген қурылыс жумысларына бағышланған Баспасөз конференциясы өткерилди. 

Конференцияда Нөкис қаласы ҳәкиминиң санаатты раўажландырыў, капитал қурылыс, коммуникациялар ҳәм коммунал хожалығы мәселелери бойынша орынбасары ў.ў.а.- Шарипов Бақберген Есенович Нөкис қаласында әмелге асырылған ҳәм режелестирилген қурылыс жумыслары ҳаққында кеӊ тәризде мағлыӯмат берди.

Ол өз баянатында төмендегилерге айрықша тоқтап өтти: Өзбекстан Республикасы Президентиниӊ 10.01.2020-жылдағы ПҚ-4565-санлы Қарарына муўапық, қалада 2020-жылда мәмлекет бюджети есабынан қаржы ажыратылатуғын жәми 9 қурылыс объектлари, баҳасы 46,916 млрд. сўм, мәнзилли мәмлекетлик бағдарламасына киргизилген. Соннан ТашПМИ қасындағы клиника имараты қурылысына 12,2 млрд. сўм, Әжинияз атындағы Нөкис мәмлекетлик педагогикалық институты имараты қурылысына 15,6 млрд. сўм  ҳәм Қарақалпақстан Республикасы санитария-эпидемиологиялық тынышлық орайы қоймаханасын реконструкция етиўге 157,6 млн. сўм пул қаржылары ажыратылыӯы белгиленген.

Сондай-ақ, қалған 6 объектлердиӊ жойбар-смета ҳүжжетлери тендер таңлаўынан өткериў мақсетинде Қарақалпақстан Республикасы Министрлер Кеӊесиниӊ бирден-бир буйыртпашы хызмети “Инжиниринг компаниясы” тәрепинен Өзбекстан Республикасы Экономиканы раўажландырыў  ҳәм кәмбағаллықты қысқарттырыў министрлиги қасындағы жойбарлар ҳәм импорт шәртнамаларын комплекс экспертиза орайы мәмлекетлик унитар кәрханасына жиберилип, 2020-жыл 31-январь күни экспертиза жуўмақлары алынған.

Нөкис қаласы халық билимлендириў бөлимине қараслы 49 ҳәм 50-санлы  мектеплерине спорт зал имараты қурылысы ушын ҳәр бирине 1,041 млрд. сўмнан, 26-санлы мектеп имаратын реконструкция етиў ушын 3,452 млрд. сўм, 37-санлы мектеп имаратын реконструкция етиў ушын 2,747 млрд. сўм, Республика эндокринология диспансери имаратын реконструкция етиў ушын 6,860 млрд. сўм, Республика қыстаўлы медициналық жәрдем көрсетиў илимий орайы Қарақалпақстан филиалы тез жәрдем бөлими имараты ушын 3,702 млрд. сўм пул қаржылары ажыратылыўы белгиленген.

Соныӊ менен бирге бүгинги күнде Нөкис қаласында қурылыс жумыслары алып барылып атырған 9 обьектте 38,939 млрд сумлық (83%) жумыслар әмелге асырылды ҳәм 40,484 млрд сум қаржыландырылды. 6 объектте жумыслар жуўмақланып, имаратты тапсырыў жумыслары әмелге асырылмақта. Өзбекстан Республикасы Министрлер Кабинетиниӊ 2020-жыл 20-августтағы 84-санлы баянламасына тийкар, Нөкис қаласында Регионал  перинатал  орайы имаратын реконструкциялаў киргизилди, объект баҳасы 4 511,5 млн. сўм болып, ҳәзирги ўақытта тийисли ҳүжжетлерди таярлаў жумыслары әмелге асырылмақта.

Буннан соӊ Баспасөз конференциясында Нөкис қаласы ҳәкиминиң инвестициялар ҳәм сыртқы саўда мәселелери бойынша орынбасары - Кудияров Полатбек Азатович тәрепинен Нөкис қаласының инвестициялық потенциалы ҳаққында мағлыӯмат берди.

Өткен 2 жыл даўамында, яғный, 2018-2019-жылларда қалада 877,5 млрд.сўмлық 255 жойбарлар иске түсирилип, жаңадан 2 214 жумыс орынлары жаратылған. Қаланың кейинги 2 жыл даўамында экономикалық өсиўин тәмийинлеў, санаат, аўыл хожалығы өнимлериниң ислеп шығарыўын жақсылаў, халыққа хызмет көрсетиў түрлерин көбейтиў, усылар арқалы халықтың бәнтлигин тәмийинлеў, сондай-ақ, экспорт потенциалын арттырыў ушын инвестицияларды қамытып алыў бойынша нәтийжели жойбарлар қәлиплестирилген.

2020-2022-жылларда Нөкис қаласында улыўма баҳасы 882,5 млрд.сўмлық 1 639 жаңа жумыс орынларын жаратыўшы 181 жойбарларды әмелге асырыў режелестирилген.

Мысал ретинде, Грузия мәмлекетинен 4,7 млн.доллар муғдарындағы туўрыдан-туўры сырт ел инвестициясы тийкарында “NUKUS MRR” жуўапкершилиги шекленген жәмийети қоспа кәрханасы тәрепинен “Турмыслық электротехника өнимлерин ислеп шығарыў”, Туркия мәмлекетинен 1,5 млн.доллар муғдарындағы туўрыдан-туўры сырт ел инвестициясы тийкарында жеке исбилермен “Таубалдиева Марта” тәрепинен “Мотел қурыў”, Япония мәмлекетинен 1,2 млн.доллар муғдарындағы туўрыдан-туўры сырт ел инвестициясы тийкарында “Greenland Water Products” жуўапкершилиги шекленген жәмийети тәрепинен “Ишимлик суўы, газланбаған лимонад ҳәм салқын тәбийий шай өнимлерин ислеп шығарыў” жойбарлары сөзимиздиӊ дәлили.

Усы жылдың 9 айы даўамында 6,3 млн.доллар муғдарындағы туўрыдан-туўры сырт ел инвестициялары өзлестирилип, белгиленген реже (01.10.2020ж. ҳалатына 9,4 млн.долл.) 149,2 процентке орынланды. Ҳәзирги күнде усы жойбарларда қурылыс-монтаж жумыслары алып барылмақта.

Баспасөз конференциясында ҳәкимликтиӊ жуўапкели хызметкерлери, қаладағы мәкеме басшыларыныӊ ғалаба хабар қураллары хәм блогерлердиӊ қызықтырған  сораўларына жуўап берди.

Нөкис қаласы ҳәкимилигиниӊ Мәлимлеме хызмети