Жаңалықлар







Ташкентте қандай жаңалық болса, Нөкиске келиўи керек


Ташкент қаласы ҳәкими Ж.А.Ортиқходжаев басшылы­ғындағы делегация ағзалары қала экономикасын көтериў, халықтың абаданлығын арттырыў бағдарында өз тəжирийбелерин бөлисиў мақсетинде бүгин Нөкис қаласына келди. 

Делегация ағзаларыниӊ биринши мәнзили «Ɵзбекстан гүзары» болды. Келген мийманлар усы жерде алып барылып атырған жумыслар менен жақыннан таныстырылды. Ҳәзирги ўақытта гүзардағы үй-жайлардыӊ морылары тәртипке келтирип, заманагөй материаллар менен қапланбақта. Сондай-ақ, фасад бөлеклери боялып, пиядалар жолы, мәдений дем алыӯ орынлары, велесипедте ҳәрекетлениў ушын жоллар қурыўы орынлары таярланып, пиядалар жолына брусчаткалар төселмекте.

Соӊ делегация ағзалары «Дослық» каналы бойында болып, халыққа қолайлы дем алыў ҳəм саўда орынларын қурыў, орынды және де көркем ҳәм пайызлы етиў бойынша өзиниң усынысларын билдирди.

Нөкис қаласының реконструкция жойбарында «Дослық» каналында музыка менен ҳәрекет ететуғын фонтан қурыў жойбарластырылған. Фонтан сулыў лазерлик эффектлер менен музыкалық композициялар қатнасында көз қызығатуғын, суўдағы әжайып шоу көринислерин көрсетеди. Суўдын пәти 35 метр бәлентликке дейин жетеди.

Және де каналдың бойына карусель қурылады. «Дослық» каналы қала турғынларының дем алатуғын орны болады. Қала турғынлары ҳәм мийманлары ҳәр күни кеште дәрья жағасында музыкалық фонтан көринислери ҳәм қаламыздың сулыў көркине қарап, пайызлы дем алады.  

Бүгингы күнде әмелге асырылып атирған жумыслардыӊ нәтийжелери ҳәққыда Нөкис қаласы ҳәкимлигинде жыйналыс болып өтти. Жыйналыста Ташкент қаласы ҳәкими Ж.А.Ортиқхўжаев басшылы­ғындағы делегация ағзалары,  Нөкис қаласы ҳәкиминиӊ орынбасарлары, қаланыӊ сектор басшылары, ғалаба хабар қураллары ўәкиллери, ҳәкимликтыӊ жуўаплы хызметкерлери ҳәм де бир қатар мәкеме, кәрхана басшылары қатнасты.

Жыйналыста қаланы ҳәр тәреплеме раўажландырыў  бойынша бир  қатар мәселелер қарап шығылды. Медицина, билимлендырыў, жаслар сиясаты, қаланы социаллық-экономикалық раўажландырыў ҳәм руўхый-ағартыўшылық тараўларына тийисли исленыўи тийис болған мәселелер көрип шығылып, биргеликте әмелге асырылатуғын жумыслар белгилеп алынды. Нөкис қаласыныӊ инвеститциялық потенциалын арттырыў, туризмди раўажландырыў бойынша да пикирлер тиӊланди. Көп қырлы бирге ислесиўди буннан былай да беккемлеў зәрүрлиги бойынша режелер белгилеп алынды.

Нөкис қаласы ҳәкимлигиниң Мәлимлеме хызмети