Жаңалықлар







Сессияға блогер неге киргизилмеди?

 


Жақында социаллық тармақларда өзин «2013-жылдыӊ еӊ жақсы журналисти» деп таныстырған блогер Нөкис қаласы ҳәкимлиги Мәлимлеме хызмети ҳәм де басқа қәнигелер 2020-жыл 21-октябрь күни өткерилген Халық депутатлары Нөкис қалалық Кеңесиниң гезектеги XVI-сессиясына қатнасыӯға тосқынлық етилгени, мағлыӯмат алыӯ ҳуқықы бузылғанлығы ҳаққында ҳәм де бюрократиялық системаны айыплап, «Youtube» социаллық тармағындағы  өзиниӊ каналына видео көринис жайғастырған.  Усы видео көринислер халық арасында кеӊ додаланып, еӊ дәслеп, ҳәкимлик ҳәм  мәлимлеме хызмети, ҳәким орынбасарлары менен бирге қәнигелери ҳаққында унамсыз пикирлерди пайда етпекте.

Нөкис қалалық Кеңесиниң гезектеги XVI-сессия жумысы ҳәм ғалаба хабар қураллары ўәкиллери, блогерлер дизими қалай шөлкемлестирилди?

  1. Хабарландырыўда сессияға  қатнаспақшы болған ғалаба хабар қураллары ўәкиллери ҳәм де блогерлер 20-октябрь күни саат 18:00 ге  шекем Нөкис қаласы ҳəкимлиги Мəлимлеме хызметиниӊ телефон номерине хабарласып, дизимге жазылыўы мүмкинлиги айтылған. Ҳәкимлик имаратына кириӯ ҳәм шығыӯ имараттыӊ нәӯбетши қараӯылы  тәрепинен тексериӯ өткерилип, ишки тәртипке көре әмелге асырылады. Сол себептен сессия өткерилиӯинен бир күн алдын ғалаба хабар қураллары ўәкиллери, блогерлерге зарүр шараятлар жаратыў (олардыӊ сессияға камера, диктофон сыяқлы басқа техникалар менен кириӯин тәмийинлеӯ) мақсетинде дизим шөлкемлестирилди.
  2. Дизим Өзбекстан Республикасы Президенти Администрациясы қасындағы Мәлимлеме ҳәм ғалабалық коммуникациялар агентлиги Қарақалпақстан Республикасы Мәлимлеме ҳәм ғалабалық коммуникациялар басқармасы менен биргеликте Мәлимлеме хызметине 20-октябрь күни саат 18:00 ге  шекем мүрәжат еткен ғалаба хабар қураллары ўәкиллери ҳәм де блогерлер киргизилди.
  3. Усы дизим тийкарында «Еркин Қарақалпақстан», «Қарақалпақстан жаслары», «Пайтахт», «Қорақалпоғистон тонги», «Жипек жолы» газеталары, Қарақалпақстан хабар агентлиги,  «@el_xizmetinde», «@saidahmadov_blogi» блогерлери телефон, диктофон, камера, ноутбук ҳәм де басқа техникалар менен бирге  киргизилди. Блогерлер тәрепинен туӯрыдан-туӯры эфирге узатылды.
  4. Сондай – ақ, видео көринисте Мәлимлеме хызмети баслығы жумыс ӯақтында өз орнында емеслиги бойынша да пикирлер билдирилген. Нөкис қаласы Мәлимлеме хызмети баслығы 21-октябрь күни 11:30 дан 12:10 ға шекем Өзбекстан миллий телерадиокомпаниясы «Qaraqalpaqstan» телеканалында қаланыӊ  азық-аўқатлар өнимлерин топлап қойыў ҳәм базарлардағы жағдайлар бойынша ролик таярлап атырған еди. Бул ролик сессияда ҳәкимниӊ биринши орынбасарыныӊ баянаты жуӯмақланғаннан кейин (баянат 15 минут, яғный, 12:15 де), жыйналғанларға қойып берилди.


Жоқарыда көрсетилген себеплерге көре, бул журналист блогер бир күн алдын дизимге алыӯ ушын мүрәжат етпегени ушын сессияға, ишки тәртипке көре Нөкис қаласы ҳәкимлиги имаратына телефон менен кириӯге рухсат берилмеген. Келешекте бундай жағдайлар жүз бермеўи ушын Нөкис қаласы ҳәкимлиги ғалаба хабар қураллары ўәкиллерин ҳәм де блогерлерди буннан былай да бирге ислесиӯге шақырады.
 


Нөкис қаласы ҳәкимлигиниң Мәлимлеме хызмети