Жаналыклар







НӨКИС ҚАЛАСЫНА КОРОНАВИРУС ИНФЕКЦИЯСЫНЫҢ ТАРҚАЛЫЎЫНА ҚАРСЫ ҚОСЫМША ИС-ИЛАЖЛАР ҲАҚҚЫНДА

НӨКИС ҚАЛАСЫНА КОРОНАВИРУС ИНФЕКЦИЯСЫНЫҢ ТАРҚАЛЫЎЫНА ҚАРСЫ ҚОСЫМША ИС-ИЛАЖЛАР ҲАҚҚЫНДА

Нөкис қаласында халықтың санитария-эпидемиологиялық тынышлығын ҳәм қәўипсизлигин тәмийинлеў, коронавирус инфекциясы тарқалыўының алдын алыўда тийисли мәмлекетлик ҳәм хожалық басқарыў органлары ҳәмде шөлкемлердиң жумысларын муўапықластырыўды шөлкемлестириў, пуқаралардың өмири ҳәм денсаўлығын қорғаў, Өзбекстан Республикасы Президентиниң 2020-жыл 19-мартдағы «Коронавирус пандемиясы ҳәм глобал кризис жағдайларының экономика тармақларына кери тәсирин жумсартыў бойынша биринши гезектеги ис-илажлар ҳаққында»ғы ПП-5969-санлы Пәрманы ҳәмде Өзбекстан Республикасы Министрлер Кабинетиниң 2020-жыл 23-марттағы «Коронавирус инфекциясы тарқалыўына қарсы қосымша ис-илажлар ҳаққында»ғы 176-санлы қарары ҳәмде Қарақалпақстан Республикасы Министрлер Кеңесиниң 2020-жыл 25-марттағы 91-санлы қарары, Өзбекстан Республикасының «Халықтың санитария-эпидемиологиялық тынышлығы ҳаққында»ғы Нызымның 31-бәнтине ҳәм «Жергиликли мәмлекетлик ҳакимияты ҳаққында»ғы Нызамның 6 ҳәм 25-бәнтлерине тийкар Нөкис қаласы ҳәкимлиги

 

ШЕШИМ ҚАБЫЛ ЕТЕДИ:

1. Нөкис қаласы аймағына 2020-жыл 27-март саат 00:01 ден баслап Республиканың барлық районларынан кириў ҳәм Республика районларына ҳәр қандай транспортларда шығыў (автобус, микроавтобус, жеңил автотранспортлар арқалы) тоқтатылсын (Республика районларынан Нөкис қаласындағы жергиликли мәмлекетлик органлары, ҳуқық қорғаўшы уйымлары, басқарма, мәкеме ҳәм шөлкемлерде мийнет (хызмет) етип атырған баслық ҳәм хызметкерлер, шыпакерлер ҳәм мийирбийкелер, мәмлекетлик санитария-эпидемиологиялық орайы хызметкерлеринен тысқары);

- Нөкис қаласына кириўши ҳәм шығыўшы шахсларға коронавирус инфекциясы белгилерин анықлаў бойынша мәжбүрий медициналық қадағалаў орнатылсын;

- Республика аймағына сырт мәмлекетлерден, Нөкис қаласына басқа аймақлардан кирип келип атырған транспорт қураллары, зат ҳәм жүклердиң мәжбүрий түрде дизинфекциялаўы тәмийинленсин;

- мәмлекетлик мекемелер ҳәм шөлкемлерде пуқаралар ҳәм исбилерменлик субъектлери ўәкиллерин қабыл етиў, оларға мәмлекетлик ҳәм басқа да хызметлерди көрсетиў имканияты барынша «онлайн» режимге өткерилсин;

- аймақлық бойсыныўы ҳәм шөлкемлестириў-ҳуқықый формасына қарамастан барлық шөлкемлердиң тийкарғы жумысына тәсир етпеген ҳалда нызам ҳүжжетлеринде белгиленген тәртипте хызметкерлерди мийнет дем алысына шығарыў, қалған бөлиминиң жумысларын максимал дәрежеде аралықтан турып (онлайн режимде яки аралық тәризинде) шөлкемлестириў илажларын көриў ўазыйпасы тапсырылсын.

2. Аймақлық бойсыныўы ҳәм шөлкемлестириў-ҳуқықый формасына қарамастан барлық шөлкемлер басшылары (ис бериўшилер) төмендегилерге әмел етсин:

- мекемеге келиўши шахсларды тек медициналық маска ҳәм медициналық қуралларды қолланған жағдайда киргизиў тәртибин мәжбүрий орнатсын;

- жумыс орынларында хызметкерлердиң дене ыссылығын өлшеў ҳәм дене ыссылығы жоқары болған хызметкерлерди жумыс орнында болыўына жол қоймаў ҳәмде усы хызметкерлер ҳаққында денсаўлықты сақлаў органларына тезлик пенен хабар бериў;

- мәмлекетлик санитариялық қадағалаў органларының талапнамасына муўапық коронавирус инфекциясын жуқтырған хызметкер менен байланыста болғанлар ҳаққында мағлыўмат бериў, кеселленген шахс болған орынларды дезинфекция етиў илажларын көриў;

- хызметкерлерге изоляция режиминде болыўға тийисли талапларға әмел етиўде көмеклесиў.

3. Қала ҳәкиминиң 2020-жыл 20-марттағы «Нөкис қаласы аймағына коронавирус инфекциясы кирип келиўиниң алдын алыў бойынша көрилип атырған ис-илажлар ҳәмде халықты санитария-эпидемиологиялық тынышлығын тәмийинлеў бойынша биринши гезекте әмелге асырылатуғын ўазыйпалар ҳақкында»ғы 01/П-19-санлы баянламасы менен тастыйықланған, Нөкис қаласына коронавирус инфекциясының кирип келиўи ҳәм тарқалыўының алдын алыў профилактикасын өткериўди шөлкемлестириў, алдағы ўақытларда анықланған жағдайлар бойынша кескин илажлар көриў ҳәмде жоқ етиўди шөлкемлестириўши ШТАБ (оператив басқарыў штабы) жуўапкершилигине жүклетилген қосымша ўазыйпаларды әмелге асырыў ушын төмендеги ҳуқықлар берилсин:

- аймақлық бойсыныўы ҳәм шөлкемлестириў-ҳуқықый формасына қарамастан барлық шөлкемлерде коронавирус инфекциясы таркалыўының алдын алыў бойынша әмелге асырылып атырған ислерди тексериў ҳәм қадағалаўға алыў;

- аймақлық бойсыныўы ҳәм шөлкемлестириў-ҳуқықый формасына қарамастан барлық шөлкемлерден ҳүжжет талап етиў ҳәм олардың басшыларын коронавирус инфекциясы тарқалыўының алдын алыў бойынша көрилип атырған ис-илажлар, санитария-гигиена илажлары ҳәм эпидемияға қарсы ис-илажлардың орынланыўы ҳаққындағы хабарларды штаб мәжилислеринде еситип барыў ўәкиллиги берилсин.

4. Нөкис қалалық ИИО ЖМБ (Х.Очилов), мәҳәлле ҳәм шаңарақты қоллап-қуўатлаў бөлими (А.Бекмуратов), медицина бирлеспеси (Ж.Тарихов), санитария-эпидемиологиялық тынышлық орайы (Р.Бекмуратова)лары менен биргеликте коронавирус инфекциясын жуқтырған яки усы инфекцияны жуқтырғанлықта гүман қылынып үй шараятында карантин қағыйдаларына әмел етиў үстинен қатаң қадағалаў орнатсын ҳәм карантин өтеў дәўиринде усы шахсларды биринши гезекте азық-аўкат өнимлери, дәри-дәрмақлар, қорғаныў (маска) ҳәм медицина буйымлары (дезинфекция қураллары ҳ.т.б) менен тәмийинлеў шараларын көрсин.

5. Нөкис қалалық ИИО ЖМБ (Х.Очилов), Өзбекстан Республикасы Миллий гвардиясы Қарақалпақстан Республикасы басқармасы (М.Юсупов), қалалық Айрықша жағдайлар бөлими (Ж.Тураев), қалалық санитария-эпидемиологиялық тынышлық орайы (Р.Бекмуратова)ларына:

- тәртиптиң әмел етиў ўақтында қаланың барлық кириў бөлимине «Блок пост»лар шөлкемлестирсин ҳәм қатаң тәртип орнатсын;

- өзинде кеселлик белгилери анықланған шахслардың ҳәм ҳәрекетлениў бағдарлары ҳақкында тез қалалық медицина бирлеспесине хабар берсин.

6. Аймақлық бойсыныўы ҳәм шөлкемлестириў-ҳуқықый формасына қарамастан барлық шөлкемлердиң тийкарғы жумыс көлемине тәсир етпеген ҳалда нызам ҳүжжетлеринде белгиленген тәртипте хызметкерлерди мийнет дем алысына шығарыў белгилеп қойылсын.

7. Нөкис қаласында жайласқан дийқан ҳәм азық-аўқат базарлары, дәриханалар, азық-аўқат дүканларынан тысқары барлық саўда объектлериниң жумыслары ўақтынша тоқтатылсын.

8. Нөкис қаласы прокуратурасы, Өзбекстан Республикасы Бас прокуратурасы жанындағы Экономикалық жынаятларға қарсы гүресиў департаменти Нөкис қалалық бөлими, қалалық мәмлекетлик салық инспекциясы менен биргеликте қаладағы азық-аўқат ҳәм аўылхожалығы өнимлериниң баҳаларын жасалма асырыўға жол қоймаслық ҳәм анықланған нызамбузыўшылық жағдайлары бойынша нызамда белгиленген тәртипте кескин илажлар көриў ўазыйпасы тапсырылсын.

9. Нөкис қаласы ҳәкиминиң орынбасарлары (Қ.Хожанов, М.Ерназаров, Е.Алланов, П.Қудияров, А.Бекмуратов), қалалық ИИО ЖМБ (Х.Очилов), қалалық медицина бирлеспеси (Ж.Тарихов), қалалық Мәмлекетлик салық инспекциясы (Б.Қарабаев), қалалық Санитария-эпидемиологиялық тынышлық орайы (Р.Бекмуратова), қалалык Қаржы бөлими (Қ.Юсупов) лерине:

- Нөкис қаласындағы мүлкшилик формасына қарамастан үзликсиз хызмет көрсететуғын барлық басқарма, мекеме, шөлкемлер хызметкерлеринен Нөкис қаласына келип ислеўшилер дизимин ислеў ҳәм қалалық штабқа усыныў;

- карантинге алынған пуқараларды жайластырыў ушын қала аймағындағы барлық оқыўшылар турар жайларын таярлаў;

- қаладағы базарларда азық-аўқат ҳәм аўылхожалық өнимлерин сататуғын ҳәм жеткерип беретуғын исбилерменлер дизимин ислеў;

- биринши гезекте дәри-дәрмақ, қорғаныў буйымлары (маска) ҳәм медицина буйымлары (дезинфекция қураллары ҳ.т.б) халыққа белгиленген баҳаларда үзликсиз жеткерип берилиўин тәмийинлесин ҳәмде зәрүр дәри-дәрмақ, медицина қураллары резервин жаратыў ўазыйпасы жүкленсин.

10. Нөкис қалалық үй-жай коммунал бөлими (Р.Жақсымов) қалалық санитария-эпидемиологиялық тынышлық орайы (Р.Бекмуратова) менен биргеликте қаладағы барлық көп қабатлы турақ-жайлардың әтираплары, подъездлери ҳәм жер төлелеринде дезинфекция ислерин әмелге асырсын ҳәм халыққа санитария-гигиена талапларына әмел етиўи бойынша түсиндириў жумысларын алып барсын.

11. Коммуналлық тараў басшылары (Қ.Утегенов, Б.Пиржанов, Н.Асенбаев, А.Бижанов)на:

- табийий газ, ишимлик суў, электр энергиясы, телефон байланысы ушын төлемлер өз ўақтында әмелге асырлмағанлығы себепли, еки ай даўамында өширилмеўи тәмийинлесин.

12. Қала ҳәкиминиң орынбасары (М.Ерназаров) қала аймағында абаданластырыў ҳәм қурылыс жумысларында ислеп атырған қурыўшылар, жумысшылар ушын жатақхана ҳәм зүрүр шараятлар шөлкемлестирсин.

13. Қала ҳәкиминиң орынбасарлары (Қ.Хожанов, Е.Алланов) қалалық Медицина бирлеспеси (Ж.Тарихов) қалалық Санитария-эпидемиологиялық тынышлық орайы (Р.Бекмуратова), қалалық Қаржы бөлим (Қ.Юсупов)лерине, қала аймағында карантинге жайластырылған пуқараларды емлеў ҳәмде коронавирус  инфекциясының алдын алыў бойынша дезинфекция ислерин әмелге асырыў ушын зәрүр болған қәрежетлер Өзбекстан Республикасы Қаржы министрлигиниң 2020-жыл 23-марттағы 01/1203-34/50-санлы ҳәм Өзбекстан Республикасы Денсаўлықты сақлаў министрлигиниң 2020-жыл 23-марттағы 06-3/25-санлы қоспа хатлары тийкарында ажыратылатуғын барлық қәрежетлер көлеминде әмелге асырыў нәзерде тутылсын.

14. Нөкис қаласы ҳәкимлигиниң мәлимлеме хызмети (Қ.Ажибаев) заманагөй ғалаба хабар қуралларын (телевидение, радио, интернет, социаллық тармақлар, мобиль байланыс операторлары ҳ.т.б) менен биргеликте халық кең қатламы арасында коронавирустың тарқалыўына имкан бериўши себеплер ҳәм шәрт-шараятларды түсиндириў, сондай-ақ, оны профилактика қылыў усыллары бойынша санитариялық үгит-нәсият жумыслары нәтийжели шөлкемлестириў илажларын көрсин.

15. Усы шешимниң орынланыўын қадағалаўды өз жуўапкершилигимде қалдыраман.

 

Нөкис қаласы ҳәкими                                                         П.Турешев

2020-жыл 26-март