Жаналыклар







АЗЫҚ-АЎҚАТЛЫҚ ӨНИМЛЕР ТОЛЫҚ ЖЕТКЕРИЛМЕКТЕ

АЗЫҚ-АЎҚАТЛЫҚ ӨНИМЛЕР ТОЛЫҚ ЖЕТКЕРИЛМЕКТЕ

Елимизге коронавирус пандемиясының кирип келиўи себепли көпшилик орынларда карантин ҳалаты енгизилип, Өзбекстан Республикасы Министрлер Кабинетиниң усы жыл 23-марттағы «Коронавирус инфекциясының тарқалыўына қарсы қосымша илажлар ҳаққында»ғы  қарарына муўапық, барлық аўқатланыў орынлары, атап айтқанда, кафе, асхана, шайхана ҳәм басқа да бир қатар исбилерменлик жумыслары тоқтатылған еди. Тек дийқан базарлары ашық қалдырылды.

Биз «Нөкис дийқан базары» баслығы Бахтияр Кучкаровтан ҳәзирги ўақытта базарда халықты азық-аўқатлық өнимлер менен тәмийинлеў, коронавирус инфекциясының алдын алыў бойынша қандай жумыслар  шөлкемлестирилип атырғанлығы туўралы мағлыўмат алдық.

Бүгинги күнде халқымызды азық-аўқат өнимлери менен тәмийинлеў толық жолға қойылды, – дейди Б.Кучкаров. – Усы мақсетте барлық районлардағы дийқан-фермер хожалықлары менен ислесетуғын исбилерменлердиң базарымызға келип, усы жерде шөлкемлестирилген саўда ярмаркаларында өзлери алып келген өнимлерди ең арзан баҳада сатыўы шөлкемлестирилмекте.

Усы жерде ҳәр күни сатылыўы талап етилетуғын орташа 5 тонна картошка, 2 тонна пияз, 1,5 тонна гешир, 2,5 тонна ун, 0,5 тоннадан капуста ҳәм гүриш, сондай-ақ, 5 мың дана нан ҳәм басқа да керекли өнимлерди есапқа алып, таза түринде сатыў ушын үш-төрт күнлик резерв пенен өнимлер алып келинип, сатыўға таярланбақта.

Ҳәзир базарымызға исбилерменлик субъектлери тәрепинен 15 тонна картошка, 30 тонна пияз, 25 тонна гешир, 10 тонна капуста, 6 тонна гүриш, 2 тонна бийдай, 30 тонна ун, 20000 дана нан, 8 тонна макарон, 2 тонна мал гөши, 8 тонна таўық гөши, 6 тонна ақ май, 10 тонна өсимлик майы алып келинген. Халықты азық-аўқатлық өнимлер менен тәмийинлеў ушын резервимиз толық жеткиликли.

Коронавирус инфекциясының алдын алыў мақсетинде ҳәр күни кеште базардың ишинде санитариялық-эпидемиологиялық тынышлық орайы хызметкерлери тәрепинен дезинфекциялаў жумыслары әмелге асырылмақта.

Тараў қәнигелери, ишки ислер, миллий гвардия хызметкерлери менен биргеликте, базарға келген пуқаралар арасында коронавирус инфекциясынан сақланыў, қәўипсизликти тәмийинлеў мақсетинде түсиник жумысларын алып бармақта.

Бизлер Хожели районынан келип, азық-аўқат өнимлери ярмаркасында қатнасып атырмыз,-дейди исбилермен А.Иманалиев. – Банан, алма, апельсин, ыссыханаларда жетистирилген таза помидор ҳәм басқа да мийўелерди орташа арзан баҳада сатып турыппыз. Өзимизде жетистирилген өнимлер витаминлерге оға да бай. Бәҳәр мәўсими болғанлықтан бул өнимлердиң өтими жоқары.

Азық-аўқат өнимлери базарға келген барлық қарыйдарлар ушын толық жеткерилмекте.

Қарақалпақстан хабар агентлиги.